மதுரை டிசம்பர் 19,
மதுரை திருப்பரங்குன்ற கோவிலில் எண்ணெய் காப்பு உற்சவம் தொடக்கம்
மதுரை திருப்பரங்குன்றம் அருள்மிகு சுப்பிரமணிய சுவாமி கோயிலில் தொடங்கிய எண்ணெய் காப்பு உற்சவத்தில் உற்சவர் தெய்வானை மட்டும் புறப்பாடாகி ஆஸ்தான மண்டபத்தை மூன்று முறை வலம் சென்று திருவாட்சி மண்டபத்தில் எழுந்தருளினார். அங்கு அம்மனுக்கு காப்பு கட்டப்பட்டு மூலிகை எண்ணெய் சாத்துப்படியாகி, அம்மன் கிரீடத்தில் கருமுடி சாத்துப்படி செய்து, தங்க ஊசி மூலம் பல் துலக்குதல், வெள்ளி சீப்பால் தலைவாருதல், மையிட்டு கண்ணாடி பார்த்தல் போன்ற நிகழ்ச்சிகள் முடிந்து தீபாராதனை நடைபெற்றது.இது போன்ற நிகழ்வுகள் டிச. 21 வரை நடைபெறும். அன்று பல்லக்கில் தெய்வானை அம்மன் புறப்பாடாகி ரத வீதிகளில் வீதியுலா நடைபெறவுள்ளது. இந்த எண்ணெய் காப்பு உற்சவம் நடைபெறும் ஐந்து நாட்களும் பக்தர்களுக்கு மூலிகை எண்ணெய் பிரசாதம் வழங்கப்படும் என்பது குறிப்பிடத்தக்கது.
