ராமநாதபுரம்,செப்.8-
உச்சிப்புளி அருகே பிரப்பன் வலசை அருகே அரசு பஸ்சின் பின்னால் கார் மோதி விபத்துக்குள்ளானது. இதில் காரில் இருந்த ஒரே குடும்பத்தைச் சேர்ந்த 2 குழந்தைகள் உட்பட 5 பேர் சம்பவ இடத்திலேயே உயிரிழந்தனர். இதில் உயிர் பிழைத்த பிறந்து 12 நாட்களே ஆன குழந்தை, குழந்தையின் தாய், கார் டிரைவர் சிகிச்சைக்காக ராமநாதபுரம் அரசு மருத்துவ கல்லூரி மருத்துவமனையில் அனுமதிக்கப்பட்டனர்.
ராமநாதபுரம் மாவட்டம் கடலாடி யைச் சேர்ந்தவர் ராஜேஷ், 33. நகை தொழிலாளி. தங்கச்சிமடம் பகுதியில் வாடகை வீட்டில் வசித்தார். இவரது மனைவி பாண்டி செல்வி, 28, இவர்களது மகள்கள் தர்ஷினா ராணி 8, பிரணவிகா 4.
இந்நிலையில் 12 நாட்களுக்கு முன் பிறந்த குழந்தைக்கு உடல் நலக்குறைவு ஏற்பட்டதையடுத்து ராஜேஷ், அவரது மனைவி பாண்டி செல்வி, அவர்களது 2 மகள்கள், பாண்டி செல்வியின் உறவினர்கள் செந்தில் மனோகரன் 70, அங்காலேஸ்வரி 58 ஆகியோர் ராமநாதபுரத்தில் உள்ள தனியார் மருத்துவமனையில் சிகிச்சை முடித்து
விட்டு வாடகை காரில் நேற்று நள்ளிரவு தங்கச்சிமடம் திரும்பினர். உச்சிப்புளி அருகே பிரப்பன் வலசை பகுதியில் வந்து கொண்டிருந்தனர்.
அப்போது இவர்களது காருக்கு முன்னால் திருப்பத்தூர் – ராமேஸ்வரம் அரசு பஸ்சில் பயணித்த பயணி ஒருவர் பஸ்சிற்குள் வாந்தி எடுத்ததார். இதனால், சாலையில் நிறுத்திய பஸ்சின் பின்னால் கார் மோதியது.
இதில் ராஜேஷ், தர்ஷினா ராணி, பிரணவிகா, செந்தில் மனோகரன், அங்காலேஸ்வரி ஆகியோர் சம்பவ இடத்திலேயே உயிரிழந்தனர். அக்காள்மடம் புயல் காப்பகம் பகுதியைச் சோந்த கார் டிரைவர் சவரி பிரிட்டோ 35, ராஜேஷ் மனைவி பாண்டிச்செல்வி, 12 நாள் குழந்தை ஆகியோர் படுகாயங்களுடன் உயிர் தப்பினர்.
அங்கு வந்த ஆம்புலன்சில் இவர்கள் 3 பேரும் ராமநாதபுரம் அரசு மருத்துவ கல்லூரி மருத்துவமனைக்கு அனுப்பப்பட்டனர்.
உயிரிழந்த ஐந்து பேரின் உடல்கள் ராமநாதபுரம் அரசு. மருத்துவமனை பிணவறையில் வைக்கப்பட்டுள்ளது. இது குறித்து உச்சிப்புளி போலீசார் வழக்குப்பதிவு செய்து விசாரித்து வருகின்றனர்.
சாலை விபத்தில் 2 குழந்தைகள் உட்பட ஒரே குடும்பத்தை சேர்ந்த 5 பேர் சம்பவ இடத்திலேயே பலியான சம்பவம் தங்கச்சிமடத்தில் பெரும் சோகத்தை ஏற்படுத்தியுள்ளது.
